Silica – kísill

Silica öðru nafni kísill hefur oft verið kallað gleymda næringarefnið. Silica er eitt algengasta steinefnið á yfirborði jarðar og það er jafnframt mikilvægt næringarefni fyrir heilbrigði fólks. Það er eitt af nauðsynlegum næringarefnum til vaxtar og viðhalds lifandi vera. Kísill örvar efnaskipti og myndun fruma. Hann styrkir allan bandvef og getur verið bólgu- og sýkladrepandi. Kísill er sérstaklega mikilvægur fyrir heilbrigði hárs, nagla, húðar, beina og brjósks.

Kísill eykur teygjanleika og þéttleika vefja og slímhúðar. Því getur hann haft góð áhrif á fólk með æða- og lungnasjúkdóma, vandamál tengd meltingafærum svo sem magasár, þembu, brjóstsviða, vindgang, harðlífi og niðurgang.

Til að líkaminn geti nýtt sér kísil í fæðu verður hann að vera í vatnsuppleysanlegu sambandi við súrefni þ.e. vera kísilsýra. Kísilsýru er hægt að fá bæði í fljótandi formi og töflum.

Kísil er helst að finna í heilkornaafurðum, haframjöli, hýðishrísgrjónum, papriku, agúrkum, jarðaberjum, sojabaunum grænu laufgrænmeti og rótar grænmeti. Albesta uppspretta kísils er þó elfting.

Einkenni kísilskorts hjá fólki er talin vera lélegt minni, hármissir og lélegur vöxtur nagla. Kísilmagn í líkamanum minnkar eftir því sem við eldumst og því er talið að eldra fólk hafi meiri þörf fyrir hann.

Upplýsingar þessar eru samansafn fróðleiks um náttúrulegar lækningar. Þeim er ekki ætlað að koma í stað tilmæla eða ráðgjafar fagfólks í heilbrigðisþjónustunni. Sjúklingar á lyfjum, einkum séu þeir haldnir alvarlegum sjúkdómum ættu að ráðfæra sig við lækni áður en þeir hefja neyslu bætiefna.