Í fyrri pistli sem fjallaði um svartan hund og þunglyndi komu fram punktar um leiðir til bata.
Þar vísaði ég í myndband sem alþjóða heilbrigðisstofnunin gaf út til að vekja athygli á hve algengt og alvarlegt þunglyndi getur verið.
Samhliða og til viðbótar við ráðleggingarnar sem er að finna í myndbandinu langar mig að birta smá lista um aðferðir sem geta hjálpað.
- Leita sér aðstoðar, viðurkenna vandann og muna að þetta er ekkert til að skammast sín fyrir. Þunglyndi getur snert alla og skert lífsgæði viðkomandi verulega og haft áhrif á ástvini og fólkið í kring. Það að tala við sína nánustu og leita til fagaðila getur gert gæfumuninn.
- Hreyfing er að mínu mati besta aðferðin við að hlaupa af sér hundinn, sér í lagi hiit æfingar. Frábært er að gera þær úti en það er að sjálfsögðu líka hægt á líkamsræktarstöð.
- HAM eða hugræn atferlismeðferð. Þar er byggt á að skilja hvernig hugsanir hafa áhrif á hluti í lífi okkar. Leitast er við að leiðrétta svokallaðar hugsanaskekkjur sem valda vanlíðan, s.s leitast við að sjá alla hluti í öðru og jákvæðara ljósi.
- Mataræði skiptir gríðarlega miklu máli. Sýnt hefur verið fram á að unnin vara geti haft neikvæð áhrif á andlegan líðan. Þarna er hvítur sykur í fyrsta sæti. Þarna vil ég líka setja inn hvíta hveitið, casein í mjólk og flest allan unnin skyndibita. Vegna vinnslunnar (oft er þetta djúpsteikt þar sem notuð er feiti sem getur valdið bólgum í líkamanum) verða næringarefni af skornum skammti en það er einmitt það sem við þurfum, næring, ekki stútfullur magi af drasli. Næringarefnin stuðla einmitt að því að öll líkamsstarfsemi sé upp á sitt besta. Ef við erum að borða sykrað og unnið drasl er viðbúið að upptaka næringaefna í smáþörmum verði skert sökum bólgna sem þessi matvæli eru að valda. Þess ber að geta að geymsla á serótónín birgðum líkamans er að mestu í meltingarærunum. En serótónín er taugaboðefni, stundum kallað gleðihormónið og hefur áhrif á skap og líðan. Ef allt er í bólgum og vitleysu í meltingafærunum gefur það auga leið að það hefur áhrif á hormónabúskap líkamans og þannig á þunglyndi.
- Hugleiðslur, bæði núvitund (mindfullness) og innhverf íhugun (transendental meditation).
- Lyf geta stundum verið nauðsynleg til að koma fólki uppúr mesta svartnættinu. Það er þó alltaf ráðlegt að reiða sig ekki eingöngu á lyf heldur vinna úr vandamálinu á heildrænan hátt. Með hreyfingu, næringu og hugaræfingum.
Með von um gleði og kærleika
Víðir Þór
Íþrótta-og heilsufræðingur
