,,Maður slær svo margar flugur í einu höggi með því að velja lífrænar vörur, bæði er viðkoma umhverfisvernd en einnig þegar kemur að heilsu okkar.”
Þegar kemur að matnum okkar vil ég forðast eiturefnaleifar, erfðabreyttar vörur, manngerð litarefni, og flest e-efni. Með því að velja lífrænar vörur get ég fengið allt þetta á einum stað. Eiturefnanotkun er bönnuð í lífrænni ræktun. Vísindamenn hafa almennt vaxandi áhyggjur af eiturefnum í umhverfinu okkar og sérstaklega mögulegum áhrifum þeirra á hormónakerfið okkar og taugaþroska fóstra og ungra barna. En með því að velja lífrænar vörur minnkum við eiturefnaleifar sem berast í líkama okkar. Ég þarf heldur ekki að hafa áhyggjur af manngerðum litarefnum í mat sem eru m.a. tengd við ofvirkni hjá börnum. Í lífrænum vörum má eingöngu nota náttúruleg litarefni, sem eru t.d. búin til úr rauðrófum eða spínati og þar fyrir utan eru einungis 53 af 396 e-efnum leyfileg.
Þegar ég fór síðan að skoða áhrifin á umhverfið, náttúruna og dýrin þá varð ég sannfærðari. Mikið er lagt upp úr dýravelferð í lífrænni ræktun. Dýrin hafa meira pláss bæði inni og úti og fæði þeirra er meira í takt við þeirra náttúrulega fæði. Líffræðilegum fjölbreytileika fer hratt hnignandi í heiminum í dag. Þar sem stunduð er lífræn ræktun er mun meiri líffræðilegur fjölbreytileiki bæði ofanjarðar og í moldinni, fleiri dýra- og skordýrategundir þrífast í lífrænu umhverfi og bakteríuflóran í moldinni líka. Þetta er því enn ein ástæða þess að velja lífrænt því líffræðilegur fjölbreytileiki er undirstaða lífs okkar hér á jörð.
Lífrænir framleiðendur verða að leita eins umhverfisvænna leiða og hægt er þegar kemur að matarumbúðum þannig að oftast er hægt að endurvinna umbúðirnar. Evrópusambandið hefur sett sér markmið um að auka lífræna framleiðslu upp í a.m.k. 25% í álfunni árið 2030 og það er vegna þessara heildrænu áhrifa á umhverfið og náttúruna – þetta er í rauninni eins sjálfbær matvælaframleiðsla og hægt er að finna í dag – og vottuð af þriðja aðila. Þetta einfaldaði í rauninni matarinnkaupin mín þegar ég áttaði mig á hversu “margar flugur í einu höggi” maður gæti slegið með því að velja lífrænar vörur. Samhliða því að kaupa lífrænar vörur, sem eru aðeins dýrari á Íslandi enn sem komið er, minnkaði ég kjötneyslu töluvert og matarsóun – þá þarf þetta ekkert að vera dýrara.
