Kelp / þari

Íslenska orðið þari er í raun samheiti yfir margar gerðir þörunga (e: seaweed) en á meðal þeirra eru söl, kombu, wakame og nori. Íslensku sölin hafa fengið viðurnefnið sjávarnasl og eru borðuð þurrkuð (með smjöri fyrir lengra komna!!), kombu er gjarnan soðið með baunum til að draga úr loftmyndandi áhrifum þeirra, wakame notað í salöt og nori í sushi.

Hins vegar eru brúnþörungar af ættinni Laminariaceae notaðir eru til framleiðslu á þaratöflum. Í þessum þara (e: kelp) er nokkuð af B-vítamíni en hann er sérstaklega steinefnaríkur og inniheldur m.a. joð, kalíum, magnesíum, kalk og járn. Joð er mjög mikilvægt fyrir heilbrigða starfsemi skjaldkirtils og getur skortur á joði valdið því að kirtillinn verði vanvirkur. Vanvirkur skjaldkirtill veldur m.a. mikilli þreytu, lágum líkamshita, harðlífi, þunglyndi, stækkun á kirtlinum (kúla á hálsinum), frjósemisvanda og hárlosi, einnig á augabrúnum. Þó fólk finni fyrir einhverju af ofangreindum kvillum, þarf það alls ekkert að tengjast skjaldkirtlinum. Best er að fara í rannsókn.

Joðskortur á Íslandi

 

Joðskortur og vanvirkur skjaldkirtill er þekkt vandamál í þróunarlöndum sem liggja fjarri sjó og afskekktum fjallahéruðum. Mikið er af joði í fiski og hefur joðskortur því ekki hrjáð okkur Íslendinga fram að þessu, en nýleg rannsókn Manneldisráðs sýnir að fiskneysla Íslendinga hefur minnkað um 50% á 12 árum. Ungt fólk hérlendis borðar orðið svo lítið af fiski að hætta er á joðskorti hjá yngri aldurshópum, einkum ungum stúlkum, sem borða að jafnaði aðeins 15 g af fiski á dag og fá því aðeins um 2/3 af því joði sem þær þurfa á að halda. Þar sem joðskortur getur haft áhrif á andlegan og líkamlegan þroska, eru þaratöflur kjörið bætiefni fyrir þá sem borða lítið af fiski.

Í þara eru einnig góð efni fyrir heilavefinn, himnur sem umlykja heilann, skyntaugar og mænuna. Eins styrkir hann neglur og æðar. Hann er steinefnaríkur og er stundum ráðlagður gegn hárlosi. Þeir sem eiga við, eða telja sig eiga við skjaldkirtilsvandamál að stríða ættu að leita til læknis.

Upplýsingar þessar eru samansafn fróðleiks um náttúrulegar lækningar. Þeim er ekki ætlað að koma í stað tilmæla eða ráðgjafar fagfólks í heilbrigðisþjónustunni. Sjúklingar á lyfjum, einkum séu þeir haldnir alvarlegum sjúkdómum ættu að ráðfæra sig við lækni áður en þeir hefja neyslu bætiefna.