Psyllium trefjar

Með nútíma vinnsluaðferðum í matvælaframleiðslu er megnið af trefjum fæðunnar fjarlægt og við sitjum uppi með trefjasnauða fæðu, svo sem hvít grjón og hvítt hveiti og þar af leiðandi hvít og trefjasnauð brauð og pasta, til að nefna nokkrar algengar vörutegundir. Þegar trefjarnar skortir, vantar burðarefnin sem koma fæðunni í gegnum meltingarveginn, sem getur valdið því að hún er allt of lengi á leiðinni og jafnvel getur þetta leitt til hægðartregðu. Þá er komið í óefni. Getur það valdið margs konar kvillum svo sem ristilpokum og getur jafnvel átt sinn þátt í þróun sjúkdóms eins og ristilkrabba.

Trefjar eru unnar víða úr jurtaríkinu svo sem hveitiklíð, hafratrefjar, baunatrefjar, ávaxtatrefjar, psyllium trefjar og fleiri og fleiri. Þessar trefjar eru mjög mismunandi, en Psyllium trefjar hafa sérstaka kosti. Þær hafa m.a. þann eiginleika að drekka í sig meiri vökva en flestar aðrar trefjar og margfaldast að ummáli. Því er nauðsynlegt að drekka vel þegar psyllium trefjar eru teknar inn, hvort sem þær eru teknar í hylkjum eða dufti, a.m.k. stórt vatnsglas. Annar kostur þeirra er þær innihalda 10-30% jurtaslím. Hægðalosandi eiginleikar þeirra helgast einmitt af því að þær breytast í slímkenndan massa sem heldur hægðunum mjúkum og hraðar þeim gegnum meltingarfærin.

Reynsla fólks af hægðarlosandi eiginleikum psyllium trefja hefur einnig verið staðfest með rannsóknum.1 Nokkrar tvíblindar rannsóknir sýna jafnframt að það lækki LDL-kólesteról (slæma kólesterólið), en virðist reyndar engin áhrif hafa á góða kólesterólið.2 Auk þess benda rannsóknir til að þær bæti glúkósaþol hjá sumum sykursjúkum, trúlega vegna uppleysanlegu trefjanna.3 Í samanburðarrannsókn kom fram að fólk með blæðandi ristilbólgu fékk jafn mikinn bata við að taka inn 20 g af möluðum psyllium fræum tvisvar á dag og lyfinu mesalamine. Frekari rannsókna er þörf til að staðfesta þetta.4

Magnið sem venjulega er notað er um 10-20 g sem blandað er í stórt glas af vatni eða safa og drukkið strax, því trefjarnar eru fljótar að verða hlaupkenndar og ólystugar. Einnig fást þær í hylkjum, en sem fyrr segir er mikilvægt að drekka vel með, einnig hylkjunum.

Vegna sinna vökvadrægu eiginleika er psyllium trefjum bætt í t.d. í glútenfrían bakstur, sem getur verið nokkuð þurr og harður, en með psyllium verða glútenfríar kökur og brauð jafn mjúk eins og venjulegur bakstur.

Psyllium trefjar eru notaðar í bætiefnasamsetningar fyrir maga og meltingarfæri eins og Colon Cleanser og Colon Forte sem samanstanda af Psyllium trefjum og Acidophilus gerlum auk annarra mikilvægra  meltingarfæragerla. Slík bætiefni eru ætluð til að byggja upp heilbrigðan gerlagróður í meltingarfærunum jafnframt því að hraða úthreinsun.

  1. Voderholzer WA, Schatke W, Mühldorfer BE, et al. Clinical response to dietary fiber treatment of chronic constipation. Am J Gastroenterol 1997;92:95-8.
  2. Oson BH, Anderson SM, Becker MP, et al. Psyllium-enriched cereals lower blood total cholesterol and LDL cholesterol, but not HDL cholesterol, in hypercholesterolemic adults: Results of a meta-analysis. J Nutr 1997;127:1973-80.
  3. Anderson JW, Allgood LD, Turner J, et al. Effects of psyllium on glucose and serum lipid response in men with type 2 diabetes and hypercholesterolemia. Am J Clin Nutr 1999;70:466-73.
  4. Fernandez-Banares F, Hinojosa J, Sanchez-Lombrana JL, et al. Randomized clinical trial of Plantago ovata seeds (dietary fiber) as compared with mesalamine in maintaining remission in ulcerative colitis. Am J Gastroenterol 1999;94:427-33.

Upplýsingar þessar eru samansafn fróðleiks um náttúrulegar lækningar. Þeim er ekki ætlað að koma í stað tilmæla eða ráðgjafar fagfólks í heilbrigðisþjónustunni. Sjúklingar á lyfjum, einkum séu þeir haldnir alvarlegum sjúkdómum ættu að ráðfæra sig við lækni áður en þeir hefja neyslu bætiefna.

 

Deila
Fyrri greinProbiotic gerlar
Næsta greinMeltingar ensím